:: لو عرفوا انك تزوجت يا ويلك !!! ::

:: الفرق بين المتزوج والحر ::

الشاب الحر ما عليه مسؤولية .. يعني لو غاب او طنش الدوام او اتخانق ما حيهمه كثير وما وراه عيال يخاف عليهم .. اما المتزوج فاكيد راح يكون اكثر قلق على وظيفته ويفكر بزوجته وعياله لو حصله شيء بالعمل وفقد ترقية او وظيفة ..

او باختصار الشاب الحر ماعنده نقطة ضعف .. اما المتزوج فنقطة ضعفه واضحة ..

:

:: اختلاف نظرة زملاء العمل ::

طبعا شيء طبيعي اننا نلاحظ ان معظم المكاتب موظفات .. او كثير موظفات بالمكان وتجد عدد الموظفين الرجال اقل .. اقصد انه مشهد طبيعي واعتدنا عليه فلم يعد هناك فرق بين رجل ومراة في العمل المقياس بالكفاءة والالتزام ..

المهم لما يجي موظف عازب للشغل .. فمن المتوقع انه يكون ملفت للانظار اكثر .. خصوصا ان فيه زي تصرف او خلينا نقول فكرة او سلوك ان البنت تحاول تحافظ على علاقة جيده بزملاءها في العمل و على مستوى الاسرة وتهتم بسمعتها الاجتماعية والانطباع الجيد اللي تتركه في نفوس الاخرين خصوصا لو كانت عازبة .. على أساس انه ماحد يعرف فين النصيب .. ممكن سمعتها تجيبلها عريس .. حد من زملاءها يعجب بشخصيتها الجيدة ويتقدملها ..

لكن لو ست متزوجة تحصلها وحش ما تخاف من حد ولا يهمها .. لو حد زعلها ما تكون دبلوماسية ترد وممكن تخربش كمان ..

لذلك من المتوقع ان الرجل العازب يلقى دعم ومساعدة باريحية وابتسامة وترحيب .. لأنه تقريبا او مرجح انه سلعة مطلوبة .. خصوصا لو من النوع المهتم لمظهره ويبان عليه ابن ناس "معظم الناس تنظر للشكل وسعر الملابس حتى" ..زي مثلا يبغاله يزوغ من الشغل ساعتين زميلته تغطي عليه .. يسالها عن شيء فورا ترد وتفيض بالشرح .. لما يكلم المديرة خصوصا لو عندها بنت قريبة من عمره راح فجاة يتحول من موظف إلى "ابنها" وفجاة تبغى تتواصل مع امه وعيلته .. واشياء مماثلة ..

وبالنسبة لمديرتي فالحمد لله عيالها كلهم أولاد خخخخ ..

اما الرجل المتزوج .. فهو اشبه بالكارت المحروق .. وبمجرد انه يتزوج راح يلاحظ ان الابتسامات والتعاون قد تلاشى .. والكلام قل .. ويحس بالغربة عن ذي قبل .. هو شعور خفيف وليس تغير جذري لكنه موجود ..

:

:: ليش ما اختارني او فكر فيا ولا انا ما اعجب ؟! ::

عند زواج زميل بالعمل .. فوارد جدا ان بعض الزميلات من لم يصبهن دور الزواج يخطر على بالهن تساؤل او انزعاج خفيف "ليش ما اختارني او حتى تقدملي" .. اما المديرة "مش كانت بنتي أولى؟!" خصوصا لو زميل عليه العين ..

:

:: استغلال حاجة المتزوج ::

طبعا اللي يتزوج حديثا راح يكون عليه مصاريف ومسؤوليات .. وقد يستغل المدير هذه النقطة بانه يستغله او يمشيه او يفرض عليه أمور غير مسبوقة .. كالاعمال التي يتهرب منها الجميع .. وطبعا خوف المتزوج على استمراره بالوظيفة او الحرص على ترقية قادمة راح يكون مثل كارت ضغط او اجبار غير مباشر للموافقة على طلبات المدير مهما كانت مزعجة ..

:

:: اياك يعرفوا انك تزوجت ::

لو كنت عازب وبعدين خطبت وبعدين تزوجت .. نصيحة خليك هاااادي بكل ذا ولا تعرف حد من زملاء عملك خصوصا المدير .. وحتى الاجازة بلاشها .. ترى لو اخدت إجازة زواج والكل عرف راح يفكرون لما ترجع ايش حيسووا فيك وكم الواجبات الإضافية والمملة اللي ناوين يهدوها لك ..

والخاتم اقلعه وقت الشغل او خبيه .. البس قفازات زي سكان الاسكيمو .. ولو حد سالك انت متزوج او لا اعمل نفسك تكح وتهز راسك وكانك تقول لا ..

:

أحيانا يحدث العكس : انه لو عازب يحملك شغل اكتر .. وهذا ينطبق على الاعمال اللي فيها نوبات سهر ومسائية غالبا ..

:

سؤال :

1-- هل فعلا هناك تغير في المعاملة للشاب سواء في العمل او اجتماعيا بعد زواجه ؟؟

2- هل واجهت او تعرف احد واجه مثل هذا التغير في التعامل ؟؟ وهل هو للافضل ام للاقل ؟؟

:

واحلاما سعيدة =)

from منتديات مكسات http://ift.tt/1QyKZwu